Тексты для проверочных работ по юкагирскому языку

Чульдии пулут
(Одун чульдии)

1) Модольэл пулут тэрикэньут тасилэ атахун уоньэт – адилэк тасилэ мархильэк. Иркидьэ чиэдьэмэ хонльэл тудэл унуннин йоуйэпул йуодиин. Прорубьнин йоудэйльэл таа йуольэлум йархаа аал эксьильэооймидэ йэрэйэ шоромо лэйнуйэ Чульдии Пулуткэлэ. Шоромо лэйнуйэ пулуткэлэ анада пугэлбиэдэгэт тотаральэлум, тудэл ааньии асьильэлум, пулундиэ ньэнуульэм:
- Мэтул пэшшэйк, мэт уорпэ тэтин кэйт!

2) Шоромо лэйнуйэ йаадум пулуткэлэ, тудэл нумэнин киэсь, мони тудэ уорпэнин:
- Унуннин хонник, мит йоуйэпул йуоник.
Чачаа тудэ эмдьэньэ прорубьнин хони, титтэгэлэ Чульдии Пулут миндэллэ эксьильгэ йумдом.

3) Чульдии Пулут тудэ ньиэргэлэ лоудэм, мони уорпэнин пэмэ анксьиник, тудэл моолаас. Мэрэт киэсь шайрэ эксьиль архин:
- Уорпэ, нумэнин эрдьиимэт?
- Эрдьиили, эрдьиили! – айаани титтэл. Титтэл модани шайрэ будиэ, нодо мэрэсь ойл ньаасьин.

4) Чульдии Пулут мэжжэсь – уорпэпул ойльэ эксьильгэ. Тудэл лондом алгудол анан амунгэлэ тамун йодэлэ чунрэлэ эйрэшум. Пэшшэйм ойл ньаасьин, тан амунги мэрэйдэллэ иркидьэ йодаайдэллэ ньаасьэдьэсь тудин, чанмах лоудись. Тии чача эмдьэньэ эксьильгэ йэдэйни. Пулут титтэгэлэ ньанмалэ коудэм, аай инрись.

5) Тудэл инродэлма, ханил мэрэт киэсь:
- Уорпэпул, мэт будиэ моданик – мони. Уорпэпул ханил будиэ модани, кужуунин мэрэйни. Шоромо лэйнуйэ мэжжэсь – уорпэпул аай ойльэни! Тудэ анан амунгэлэлондом. Пэйжим ойл ньаасьин, ойл миидэ, унун йагилнин – тан амунги кисилпэлэ лэбиэгэ ньичагайнуй. Тасилэ кужуунин пэшшэйм тудэгэлэ – амунги лоудись кисилпэлэ чандэ тамун йалаат уорпэпул эксьильгэ лоудунуй. Чомогото коудэм уорпэплэ пулут. Кэбэйни титтэл йаклубудэ.